Камісіі для рэферэндуму сфармаваны без апазіцыйных кандыдатаў
![](https://www.voiceofbelarus.org/wp-content/uploads/2022/02/konstituciya_referendum_17.jpg)
Цэнтральная выбарчая камісія Беларусі завяршыла фармаванне ўчастковых камісій па правядзенні канстытуцыйнага рэферэндуму. Сярод іх чальцоў няма ніводнага прадстаўніка апазіцыі.
Як паведамляе «Вясна», больш за 98% кандыдатаў, вылучаных праўладнымі палітычнымі партыямі, аб’яднаннямі і прафсаюзамі, былі ўключаны ў склад участковых камісій (больш за 30 тыс. чалавек). У той жа час ніводны з 42 прадстаўнікоў, вылучаных апазіцыйнымі партыямі і іншымі грамадскімі аб’яднаннямі, не патрапіў у склад камісій.
Створаныя ўладамі варункі ўсеагульнага страху і рэпрэсій, а таксама татальны кантроль за працэсам фармавання ўчастковых выбарчых камісій прывялі да таго, што ўпершыню ў гісторыі незалежнай Беларусі апазіцыя ўвогуле не прадстаўлена ў выбарчых камісіях.
Нагадаем, што раней беларускія ўлады адмовіліся ад стварэння ўчастковых камісій за межамі Беларусі, што фактычна пазбавіла вялізную колькасць беларусаў магчымасці рэалізаваць сваё выбарчае права на гэтым «рэферэндуме».