2022-02-27
Уладзімір Зяленскі. Архіўная выява

Прэзідэнт Украіны Уладзімір Зяленскі апублікаваў новы відэазварот. На гэты раз ён звярнуўся да грамадзян Беларусі. Паводле яго слоў, мінулая ноч ва Украіне была жорсткай, зноў былі абстрэлы, бамбаванне жылых кварталаў і грамадзянскай інфраструктуры.

«На сёння няма ніводнага аб’екта ў краіне, які акупанты не лічылі б для сябе дапушчальнай мішэнню. Яны ваююць супраць усіх, супраць усяго жывога: дзіцячых садкоў, жылых дамоў і нават супраць машын хуткай дапамогі. Яны прымяняюць рэактыўную артылерыю, ракеты супраць цэлых гарадскіх раёнаў, у якіх няма і ніколі не было ніякай ваеннай інфраструктуры. …Гарады Украіны выжываюць у такіх умовах, якія апошні раз былі на нашай і на вашай зямлі падчас Другой сусветнай вайны. Але ў вайне, якая ідзе зараз, вы з намі не на адным баку», – сказаў Зяленскі.

У сваім звароце Зяленскі параўнаў цяперашні напад Расеі на Украіну з падзеямі пачатку гітлераўскага ўварвання ў СССР у 1941 годзе. Тады таксама бамбаванне Кіева пачалося а 4-й гадзіне раніцы. Але гэтым разам бомбы ляцелі на сталіцу Украіны з Беларусі. «Вы спалі, браты беларусы! – ушчуваў Зяленскі. – А мы з тае пары ўжо не кладземся. Мы змагаемся за сваю краіну, змагаемся за сваю свабоду».

Украінскі прэзідэнт нагадаў, што сёння, 27 лютага, у Беларусі праходзіць «рэферэндум», і заклікаў беларусаў прачнуцца. «Усё гэта – таксама дэ-факта рэферэндум для вас. Вы вырашаеце, хто вы, вы вырашаеце, кім вы хочаце быць і як вы будзеце глядзець у вочы сваім дзецям, як вы будзеце глядзець у вочы адзін аднаму, сваім суседзям. А мы – вашыя суседзі. Будзьце Беларуссю, а не Расеяй, – дадаў прэзідэнт. – Зрабіце правільны выбар. Я ўпэўнены, гэта – галоўны выбар вашага вялікага народа!»

Зяленскі падкрэсліў, што мірныя перамовы ў Мінску – а менавіта гэтую пляцоўку прапанавала Масква, у адпаведнасці са сваёй схільнасцю да гістарычнага сімвалізму, – немагчымыя, паколькі Беларусь больш не з’яўляецца нейтральнай краінай, мірнай краінай-суседкай.

Нагадаем, што нелегітымны кіраўнік Беларусі запрасіў на тэрыторыю краіны расейскія акупацыйныя войскі, стварыўшы такім чынам магчымасць масіраванага ўдару па Кіеве.