2022-03-29
Беларускія добраахвотнікі ва Ўкраіне.

Як паведамляе «Наша Ніва», ва Украіне дзейнічаюць ці знаходзяцца ў працэсе фармавання чатыры беларускія ўзброеныя групы, дзве з якіх сваёй канчатковай мэтай бачаць вызваленне Беларусі. Працэс фармавання адной з груп шырока асвятляецца, у той час як стварэнне найбуйнейшай з іх адбываецца непублічна.

Самае вядомае падраздзяленне – батальён імя Кастуся Каліноўскага. Яго камандзіры – гэта беларусы, якія прайшлі падрыхтоўку ва ўкраінскім палку «Азоў», знакамітым праз сваю эфектыўнасць у баі, а таксама неадназначную рэпутацыю. Нядаўна некалькі ўзводаў батальёна імя Каліноўскага перайшлі пад камандаванне Ўзброеных сіл Украіны, хутчэй за ўсё тое ж найбліжэйшым часам зробіць і пазасталая частка батальёна. Гэта было патрабаванне ўкраінскіх спецслужб, якія імкнуцца папярэдзіць узнікненне «атаманшчыны».

Меншае ў сіле фармаванне беларусаў сабрана былым байцом «Азова» Сяргеем («Малютай») Кароткіх. У яго складзе ёсць беларускія футбольныя фанаты. Яно базуецца ў Кіеве і ўдзельнічае ў баявых дзеяннях.

Яшчэ адна ўзброеная група беларусаў, у складзе некалькіх тузінаў чалавек, служыць у тэрытарыяльнай абароне Адэсы. Самай значнай узброенай групоўкай беларусаў, мабыць, стане батальён, які знаходзіцца ў працэсе фармавання і камплектуецца з былых байцоў сіл спецаперацый Беларусі. Ён будзе падпарадкоўвацца камандаванню Міжнароднага легіёна ў складзе Ўзброеных сіл Украіны. Публічнай інфармацыі пра яго пакуль няма. Гэтае падраздзяленне, магчыма, атрымае сучасную зброю, якую мае ўкраінская армія, але не беларуская. Вайскоўцы-беларусы, якія далучаюцца да ўкраінскага войска, у першую чаргу жадаюць дапамагчы Украіне адбіць расейскую агрэсію.