Год калоніі за публікацыю песні “Лукашенко, уходи” ў сацсетках
![](https://www.voiceofbelarus.org/wp-content/uploads/2021/08/photo_2021-08-23_12-47-13.jpg)
У судзе горада Гомеля 23 жніўня агучылі прысуд Сяргею Балахонаву, якога абвінавацілі ў “абразе прэзідэнта” (арт. 368 КК РБ) за публікацыю ў сацсетцы песні “Лукашенко, уходи”. Балахонава асудзілі на адзін год пазбаўлення волі ў калоніі агульнага рэжыму.
Падсудны прызнаў віну і пакаяўся, але дадаў, што захаваў сабе песню не з прычыны палітычнай варожасці – ён не ўнікаў у сэнс і “зразумеў, што песня мела абразлівы характар” толькі тады, калі яго затрымалі.
“Сведка”-міліцыянт на судзе патлумачыў, што песню на старонцы Балахонава выявілі “ў працэсе маніторынгу”, а потым праводзілі “аператыўна-пошукавыя мерапрыемствы”, падчас якіх выявілі, што мужчына “негатыўна ставіцца да міліцыі і ўлады”. Аднак міліцыянт адмовіўся гаварыць, якім чынам гэта выяўлялася.